У Лагішыне ўшанавалі славутую каталіцкую святыню

Логишин
У Лагішыне ў санктуарыі Маці Божай Каралевы Палесся, галоўнай Апякункі Пінскай дыяцэзіі, 21-22 жніўня адбыліся традыцыйныя ўрачыстасці на ўшанаванне слыннага цудадзейнага абраза з удзелам пілігрымаў з розных куткоў беларускага Палесся.

Прыехалі як аўтапілігрымы, так і пешыя групы вернікаў, некаторыя з іх наведалі на шляху да Маці Божай санктуарый святога Андрэя Баболі ў Янаве Палескім і  Пінскую катэдру і семінарыю з крыптамі Слугі Божага біскупа Зыгмунта Лазінскага і кардынала Казіміра Свёнтка, паведамляе catholic.by.

Фэст у гонар Каралевы Палесся распачаўся з урачыстага прывітання пешых пілігрымак, якія сёлета прыбылі з Баранавічаў, Бярозы і Івацэвічаў.

Кусташ санктуарыя кс. Тадэвуш Шэшка сардэчна вітаў сотні пешых пілігрымаў, сярод якіх былі таксама вернікі грэка-каталіцкага абраду.

 

Вігілійную св. Імшу дыяцэзіяльнай урачыстасці узначаліў вікарый Мінска-Магілёўскай архідыяцэзіі біскуп Юрый Касабуцкі.

На заканчэнне літургіі шматлікія вернікі разам з сабранымі біскупамі, святарамі і кансэкраванымі асобамі прайшлі ў працэсіі са свечкамі вакол санктуарыя. Пасля набажэнства адбыўся адмысловы музычны канцэрт праслаўлення Пана з удзелам маладых пілігрымаў і парафіяльных музычных гуртоў Пінскай дыяцэзіі.

Працягам святкавання стала усяночнае малітоўнае чуванне, спалучанае з Эўхарыстычнай Адарацыяй перад цудадзейнай іконай Багародзіцы.

22 жніўня Святую імшу ў гонар Валадаркі Палесся ўзначаліў дапаможны біскуп Гродзенскай дыяцэзіі Юзаф Станеўскі. У гаміліі пастыр нагадаў пра асаблівасць сёлетняга святкавання Лагішынскага фэсту ў сувязі з 80-й гадавінай кананізацыі святога Андрэя Баболі, апекуна Пінскай дыяцэзіі.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі