БАПЦ падтрымлівае ўкраінскую аўтакефалію

8F201089-D5DA-4168-83F8-93FF81D5DAE6_cx0_cy21_cw0_w1023_r1_s

Беларуская Аўтакефальная Праваслаўная Царква падтрымлівае рашэнне Канстанцінопальскага патрыярхату надаць Украінскай Праваслаўнай царкве статус аўтакефальнай. Пра гэта ў інтэрв’ю Радыё Свабода заявіў кіраўнік БАПЦ, архіепіскап Святаслаў Логін. Паводле яго, БАПЦ таксама імкнецца легалізавацца ў Беларусі і афіцыйна атрымаць статус аўтакефаліі.

Архіепіскап нагадаў, што раней Беларуская Царква таксама “рабіла рэальныя крокі для таго, каб атрымаць аўтакефалію і каб яе прызналі”.

“Украінская царква нам родная і блізкая, таму што ў мінулым мы мелі адзіную мітраполію — царква ў Беларусі пачыналася з Кіеўскай мітраполіі. Пазней гэта была Кіева-Літоўская мітраполія з цэнтрам у Наваградку — яна была знішчана Маскоўскай царквой. І да сёння Масква робіць усё, каб Украінская і Беларуская цэрквы аўтакефаліі не атрымалі”, – адзначыў ён, назваўшы Украіну прыкладам для Беларусі.

На яго думку, “калі прызнаюць украінскую царкву, то наступныя крокі павінны быць і адносна беларускай царквы”. Архіепіскап нагадаў, што Канстанцінопаль па-ранейшаму лічыць Кіеўскую мітраполію, часткай якой была і Беларусь, сваёй кананічнай тэрыторыяй.

“Каноны, як вядома, вымагаюць для асобнага праваслаўнага народу асобнай царквы. Гэта 34-е апостальскае правіла. А каноны не абмяркоўваюцца, а выконваюцца”, – падкрэсліў Святаслаў.

“Мы маем усе кананічныя падставы для таго, каб царква ў Беларусі мела незалежнасць і права абвяшчаць аўтакефалію”, – сказаў ён.

Паводле яго, у апошнія гады ў Беларусі цягу да царкоўнай незалежнасці маюць як святары, так і вернікі Беларускага экзархату РПЦ. Іерарх нагадаў, што на сходзе святароў Мінскай епархіі было аднагалосна падтрыманае наданне Экзархату права аўтаноміі, якую не зацвердзілі ў Маскве.

Што тычыцца сённяшняга стану БАПЦ, то, як адзначыў іерарх, у Беларусі сёння з прычыны таго, што парафіі царквы ўладамі не рэгіструюцца, дзейнічаюць тры рэлігійныя грамады і некалькі суполак. Ёсць пяць святароў, дыяканы, чытальнікі, адбываюцца службы, святары бяруць актыўны ўдзел у грамадскім жыцці.

За мяжой у БАПЦ ёсць тры паўнавартасныя парафіі ў ЗША, адна ў Канадзе, тры ў Аўстраліі і яшчэ адна грамада ў Ангельшчыне, дзе цяпер няма святара. Архіепіскап не выключае высвячэнне новага епіскапа, калі ў Беларусі пачнецца колькасны рост нашых вернікаў.

Таксама за мяжой дзейнічае некалькі беларускіх парафій у юрысдыкцыі Канстанцінопальскага патрыярхату (у Таронта, у Нью-Ёрку, у Ангельшчыне, у Чыкага), але яны “паступова перастаюць быць беларускімі”.

Нагадаем, што Сінод Беларускай Праваслаўнай Царквы асудзіў наданне Канстанцінопалем аўтакефаліі Украінскай Царкве.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com
14.09.2018 Беларусь| Тэгі: , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты