Правацэнтрысцкая кааліцыя пойдзе на выбары адзінай

Screenshot_14

26 верасня кіраўнікі Аб’яднанай грамадзянскай партыі, аргкамітэту партыі «Беларуская хрысціянская дэмакратыя» і руху «За свабоду» заявілі, што правацэнтрысцкая кааліцыя пачынае падрыхтоўку да парламенцкіх і прэзідэнцкіх выбараў.

«Для правацэнтрысцкай кааліцыі праблемы байкоту выбараў не існуе, — заявіў выканаўца абавязкаў старшыні АГП Мікалай Казлоў. — Мы пераканаліся, што за тры месяцы агітацыйнай кампаніі можна зрабіць вельмі шмат для асветы людзей, і не скарыстацца такой магчымасцю было б проста абсурдна. Таму ніякага байкоту ні адных, ні другіх выбараў не будзе».

Спачатку праграма і каманда, пасля — кандыдат

«Падрыхтоўка да новых прэзідэнцкіх выбараў гэтым разам будзе прынцыпова адрознівацца ад папярэдніх кампаній, — заявіў сустаршыня аргкамітэту Беларускай хрысціянскай дэмакратыі Віталь Рымашэўскі. — Калі раней на першы план выходзіла фігура адзінага кандыдата, то гэтым разам мы спачатку ствараем адзіную каманду і рыхтуем для нашага прэтэндэнта каля дзясятка праграмаў па самых актуальных праблемах жыцця».

Паводле яго, галоўнае каб у вызначэнні адзінага кандыдата «было задзейнічана як мага больш людзей».

«Магчыма, прэтэндэнта вызначым праз праймерыз ці нейкім іншым шляхам. Але імя кандыдата назавуць, і гэта будзе значна раней, чым за тры месяцы да даты выбараў. Працэдура абрання адзінага кандыдата будзе запушчаная ў 2019 годзе», — сказаў Рымашэўскі.​

Рэгіёны вызначаюць кандыдатаў у Палату прадстаўнікоў

«Правацэнтрысцкая кааліцыя пачала вызначаць патэнцыйных кандыдатаў для ўдзелу ў выбарах у Палату прадстаўнікоў, — заявіў старшыня руху „За свабоду“ Юрась Губарэвіч. — У рэгіёнах ужо пачалася праца. Ідзе фармаванне камандаў, вылучэнне актывістаў, вызначаюцца самыя болевыя пункты рэгіёнаў. Усё гэта дапаможа падчас правядзення агітацыйнай кампаніі. Можна сказаць, што рэальная палявая праца ў рэгіёнах ужо пачалася».

Аб’яднаная грамадзянская партыя, заснаваная ў 1995 годзе. Яна была ўтвораная праз аб’яднанне Грамадзянскай (заснаванай у 1994-м) і Аб’яднанай дэмакратычнай партыяў (заснаванай у 1990-м). АГП з нядаўняга часу ўзначальвае Мікалай Казлоў. У Палаце прадстаўнікоў ёсць адна прадстаўніца АГП (і адна з дзвюх апазыцыянэрак сярод 110 дэпутатаў), Ганна Канапацкая.

Беларуская хрысціянская дэмакратыя, адроджаная ў 2004 годзе, а заснаваная аж у 1927-м. Арганізацыя ўжо сем разоў спрабавала зарэгістравацца ў якасці партыі, але пастаянна атрымлівала адмовы. У БХД чатыры сустаршыні: Павал Севярынец, Віталь Рымашэўскі, Георгі Дмітрук і Вольга Кавалькова. У мясцовых саветах ёсць адзін апазіцыйны дэпутат, прадстаўнік БХД Валер Білібуха.

Рух «За свабоду», заснаваны ў 2006 годзе пасля прэзідэнцкіх выбараў апазіцыйным кандыдатам Аляксандрам Мілінкевічам. Рух цяпер узначальвае Юрась Губарэвіч. Сваіх дэпутатаў не мае, хоць прадстаўнікі руху удзельнічалі ў мясцовых і парламенцкіх выбарах.

Радыё Свабода

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com
26.09.2018 Беларусь| Тэгі: , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты