200-годдзе спеву «Ціхая ноч» адсвяткуюць у Беларусі калядным канцэртам у оперным тэатры

stille-nacht-kapelle-oberndorf-stadt-laufen-thcontentgalleryresponsive

26 снежня ў камернай зале Вялікага тэатра оперы і балету ў Мінску адбудзецца ўрачысты калядны канцэрт з нагоды 200-годдзя спеву «Ціхая ноч». Арганізатары канцэрту – пасольства Аўстрыйскай Рэспублікі ў Рэспубліцы Беларусь і Вялікі тэатр оперы і балету Беларусі.

Упершыню знакамітая песня «Ціхая ноч, святая ноч» прагучала ў аўстрыйскім гарадку Оберндорф у 1818 годзе. Адбылося гэта 24 снежня на Божае Нараджэнне.

Спеў уключаны ў спіс нематэрыяльнай культурнай спадчыны ЮНЕСКА.

Мінскі канцэрт з нагоды 200-годдзя песні «Ціхая ноч» пройдзе з удзелам салістаў Томаса Вайнхапеля (Аўстрыя) і Юліі Лебядзенка (Беларусь/Аўстрыя).

У 2017 годзе Томас Вайнхапель атрымаў званне «Лепшы оперны спявак года». Як у аперэтах, так і ў оперы ён адчувае сябе як рыба ў вадзе. У дзяцінстве Вайнхапель быў салістам Венскага хору хлопчыкаў, з якім гастраляваў па ўсім свеце.

Канцэрт у Мінску стане для Томаса Вайнхапеля дэбютным выступленнем у Беларусі.

Ураджэнка беларускай сталіцы Юлія Лебядзенка сёння жыве і працуе ў Вене. У свой час спявачка была стыпендыятам спецыяльнага фонду Прэзідэнта Рэспублікі Беларусь па падтрымцы таленавітай моладзі, а таксама перамагала на шматлікіх міжнародных конкурсах.

У якасці салісткі Юлія Лебядзенка выступае з рознымі сімфанічнымі і камернымі аркестрамі.

Томаса Вайнхапеля і Юлію Лебядзенка яднае творчае сяброўства, разам яны прадставяць у Мінску аўстрыйска-беларускую калядную праграму, у якую ўвойдуць беларускія калядкі, а таксама творы Брамса, Штольца, Моцарта, Мора і іншых аўтараў.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі