Навагодняя свіння для беларускіх хрысціянаў

ngkitay-750x405-1

Што ж, дарагія беларускія хрысціяне, рады павіншаваць вас з навагодняй свіннёй. І справа тут не столькі ва ўсходнім календары, па якім Новы год наступіць яшчэ толькі ў лютым, а ў той свінні, якую падклалі беларускія ўлады. Прычым не нейкай адной канфесіі, а адразу некалькім.

Так, ужо ў самыя першыя дні студзеня стала вядома, што ў Мінску плануецца пусціць пад знос будынак поўнаевангельскай царквы “Новае жыццё”, а замест яго пабудаваць школу з басейнам. Пра гэта сведчыць дэталёвы план забудовы паўднёвай часткі мікрараёна Сухарава (вуліцы Карскага, Маршала Лосіка, Семяняка, Калгасная і г. д.), які быў апублікаваны на сайтах адміністрацый Фрунзенскага і Маскоўскага раёнаў.

Затым з’явілася інфармацыя аб тым, што польскаму святару-францішканіну Сабеславу Тамале, які 20 гадоў служыць у рымска-каталіцкай парафіі святога Францішка ў Салігорску і ўдзельнічаў у будаўніцтве мясцовага храма, з 31 студзеня забаронена ажыццяўляць рэлігійную дзейнасць у Беларусі. Прычына такога рашэння, як звычайна, не называецца.

І вішанька на навагоднім торце – Міжнародны Фестываль надзеі, запланаваны на 3-5 траўня ў Мінску, так і не атрымаў афіцыйнага ўзгаднення на дзяржаўным узроўні. «Працэс падрыхтоўкі быў пачаты яшчэ ў траўні 2018 года і да гэтага часу мы правялі цэлы шэраг важных сустрэч, а таксама Школу дабравесця. Але дзверы для гэтага служэння ў Мінску пакуль яшчэ не адчыненыя», – заяўляе біскуп Саюза Евангельскіх хрысціян-баптыстаў Беларусі Леанід Міховіч.

Вось так прайшлі першыя два тыдні 2019 года для беларускіх хрысціянаў. Магчыма, гэта не ўсё, бо практыку замоўчваць праблемы, у тым ліку ва ўзаемаадносінах з уладамі, яшчэ ніхто не адмяняў. Але калі вы спадзяецеся на тое, што далей будзе лягчэй, дык спяшаюся вас засмуціць – не будзе. Вопыт паказвае, што не. І нельга сказаць, што віны саміх цэркваў у гэтым няма.

Змяніць сітуацыю можна было б за кошт больш адкрытых кантактаў цэркваў са СМІ, больш устойлівых адносін, у тым ліку ў адстойванні сваіх інтарэсаў, з грамадзянскай супольнасцю і палітычнымі партыямі, за кошт гарантаваных Канстытуцыяй правоў на свабоду слова, асацыяцый і сходаў. Але ў тое, што беларускія цэрквы пойдуць на гэта, верыцца з цяжкасцю.

Максім Гацак

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
15.01.2019 Каментары і аналітыка| Тэгі: , , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты