Раскладка не на карысць Масквы

8ac170594ead4344f930225227b7aa42

З помпай, на самым высокім дзяржаўным узроўні і ў Крамлі, адзначылі 10-годдзе інтранізацыі Патрыярха Маскоўскага Кірыла. Нагаварылі кучу з коптурам кампліментаў, але, думаю, сам Кірыл разумее, што не ўсё так добра. Я не пра падзенне яго асабістага аўтарытэту-рэйтынгу і ўзначаленай ім Царквы, я пра тое, як складваюцца адносіны РПЦ і яе прадстаяльніка з іншымі праваслаўнымі цэрквамі.

На сёння, акрамя Маскоўскай, мы маем 14 аўтакефальных праваслаўных цэркваў на чале з Канстацінопальскай, або Усяленскім Пасадам. У Маскву, каб павіншаваць Кірыла асабіста, прыехалі прадстаяльнікі толькі трох цэркваў – Антыяхійскай, Сербскай ды Чэшскіх земляў і Славакіі.

Першая з гэтых трох цэркваў жыве пад уладай сірыйскага дыктатара і саюзніка Масквы Асада.  Другая Царква, Сербская, падтрымлівае Маскву ў супрацьстаянні з Фанарам, бо ніхто не гарантаваў, што Усяленскі Пасад не дасць аўтакефалію цэрквам Паўночнай Македоніі і Чарнагорыі. Нарэшце, Царква Чэшскіх земляў і Славакіі ніяк не можа вылузацца з маскоўскіх абдымкаў.

Не прыехалі на Кірылава свята прадстаяльнікі 11 цэркваў. Не будзем лічыць грузінскага Патрыярха-Каталікоса Ілью ІІ, у якога цяжкая хвароба, а вось ачольнікі іншых чатырох цэркваў – Александрыйскай, Румынскай, Балгарскай і Польскай – таксама палічылі за лепшае адправіць у Маскву сваіх падначаленых. Яшчэ шэсць цэркваў – Канстанцінопальская, Ерусалімская, Кіпрская, Эладская, Албанская і Украінская – наогул не былі прадстаўленыя на святкаванні. Што тычыцца Канстанцінопальскай і Украінскай цэркваў, то ім, з усёй пэўнасцю скажам, запрашэнне не высылалі, а што тычыцца Ерусалімскай, Кіпрскай, Эладскай ды Албанскай цэркваў, то яны, якія адносяцца да грэчаскіх, сваёй непрадстаўленасцю ў Маскве, пэўна, выказалі салідарнасць з Канстанцінопалем. І з Праваслаўнай Царквой Украіны.

Назіральнікі заўважылі, што рыторыка Кірыла ў дачыненні да Канстанцінопаля памякчэла. Гэта, мабыць, тлумачыцца тым, што згуртаваць вакол сябе большасць праваслаўных цэркваў, сабраць іх прадстаяльнікаў у Маскве, паспрабаваць навязаць ім свой парадак дня ды ўчыніць калектыўны афронт Канстанцінопалю не ўдаецца. Не можа стаць Маскоўская Царква гегемонам Праваслаўя.

Прыезд-непрыезд прадстаяльнікаў праваслаўных цэркваў і ўпаўнаважаных прадстаяльнікамі архірэяў на Кірылава свята ў Маскву, можна думаць, паказвае таксама, якія цэрквы раней, а якія пазней прызнаюць аўтакефалію Праваслаўнай Царквы ва Украіне.

Анатоль Сідарэвіч.

1 лютага 2019 г.

Фота РИА Новости

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com
03.02.2019 Каментары і аналітыка| Тэгі: , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой Падзейнік - добры падарунак да святаў

Абвесткі

Рубрыка

Спецпраекты