Вяртанне Берасцейскай Бібліі ў грамадскую свядомасць

Копия Изображение 368

У верасні мінулага года на выставе «Беларусь і Біблія» ў Нацыянальнай бібліятэцы разгортваўся шэраг знамянальных падзей: праходзілі лекцыі вядомых навукоўцаў з ЗША, адбываліся круглыя сталы і дыскусіі пра ролю Бібліі ў грамадстве. Сёлета працягам выбітных падзей стала прэзентацыя факсімільнага ўзнаўлення Берасцейскай Бібліі і мерапрыемствы, звязаныя з ёй.

27 верасня з першай надзвычай цікавай лекцыяй «Берасцейская Біблія: адкрыты дотык», прысвечанай кніжнаму шэдэўру эпохі Адраджэння, выступіў знаны даследчык кніжнай спадчыны Беларусі, кандыдат культуралогіі Алесь Суша. У сваёй бліскучай прамове ён абгрунтаваў 30 падставаў для ўшанавання велічнага помніка паліграфічнага мастацтва ХVI стагоддзя і 30 прычын для гонару здабыткамі нацыянальнай культуры.

«Інфармацыю пра гэты кніжны помнік у савецкія часы не бачылі ні ў падручніках, ні ў навуковых манаграфіях, – распавёў Алесь Суша. – Але гэты помнік не сыходзіў з дыскурсу палякаў, расіян і літоўцаў. Сёння пачынаецца вяртанне гэтага помніка беларусамі. 15 гадоў таму ідэя факсімільнага перавыдання Берасцейскай Бібліі падавалася немагчымай з-за слабой матэрыяльнай і паліграфічнай базы. Цяпер гэта адбылося».

Берасцейская Біблія пачала выданне Старога і Новага Запавету ў поўным аб’ёме. Князь Мікалай Радзівіл камунікаваў з многімі кіраўнікамі дзяржаў свету і адчуваў сябе адным з актыўных удзельнікаў культурнага працэсу, ён быў нароўні з волатамі эпохі Адраджэння. Берасцейская Біблія стала помнікам эпохі абмеркавання ролі веры ў грамадстве, актыўнай рэлігійнай дыскусіі, – пацвердзіў даследчык.

SAM_2974

Берасцейская Біблія выкарыстоўвалася не толькі кальвіністамі і антытрынітарыямі, але католікамі і праваслаўнымі. Яна з’яўляецца адным з прыкладаў верацярпімасці на беларускай зямлі. На Беларусі ў ХVI стагоддзі дзейнічала значная кольскасць друкарняў рознай прыналежнасці.

Найбольш пераканаўча ў лекцыі прагучаў адзін з тэзісаў: Мікалаю Радзівілу Чорнаму праз друкаванне Берасцейскай Бібліі ўдалося ўзняць прэстыж свайго роду, веры і краіны.

Цудоўны прыклад мецэнацкай ініцыятывы служыць нам і сёння. Навуковец абверг гіпотэзу аб паленні Берасцейскай Бібліі нашчадкамі Радзівілаў, спасылаючыся на вялікую колькасць асобнікаў, якія захаваліся ў свеце – 130.

У свята Ўздзвіжання Жыватворчага Крыжа Гасподняга лекцыю вядомага знаўцы хрысціянскай культуры Беларусі з цікавасцю выслухалі пісьменнікі, мастакі, прадстаўнікі канфесійнага друку, студэнты. Прысутныя выказалі шчырую падзяку даследчыку за нястомную руплівасць па вывучэнні і захаванні скарбаў нацыянальный кніжнай культуры.

«Берасцейская Біблія з’яўляецца сімвалам гораду Брэста і нашай краіны. Для мяне асабіста і для нашай гісторыі і культуры гэта тэма вельмі важная. Я рады, што з’явілася факсімільнае ўзнаўленне Берасцейскай Бібліі, і што будзе шэраг падзей, звязаных з ушанаваннем гэтага помніка Рэфармацыі», – адзначыў супрацоўнік Інстытута гісторыі НАН, кандыдат гістарычных навук Андрусь Унучак.

Вяртанне ў грамадскую свядомасць кніжнага помніка будзе працягвацца.

Наведвальнікаў бібліятэкі чакаюць у кастрычніку лекцыі экспертаў і навуковы круглы стол, выстава ў музеі кнігі і майстар-класы па пераплёце, музейныя заняткі для дзяцей і тэатралізаваная пастаноўка.

Э.Дзвінская, фота аўтара

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
30.09.2019 Грамадства| Тэгі: ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты