Пратэсты ў Мінску: хрысціяне і незалежнасць

7 і 8 снежня ў Мінску прайшлі масавыя пратэсты за незалежнасць Беларусі – на фоне перамоваў пра “паглыбленую інтэграцыю”, якія вядуць Лукашэнка і Пуцін.

Найважнейшыя міждзяржаўныя пагадненні вось ужо некалькі месяцаў рыхтаваліся таемна ад грамадства. Напружанне нарастала. У пятніцу 29 лістапада пасол Беларусі ў Расіі Уладзімір Сямашка заявіў, што прэзідэнты дамовіліся пра супольны урад і парламент. 8 снежня планавалася падпісанне “дарожных картаў” паглыбленай інтэграцыі.

Гэта стала іскрай. Лідар Беларускай Хрысціянскай Дэмакратыі Павел Севярынец абвясціў акцыю пратэсту 7 снежня на плошчы Кастрычніцкай у Мінску.

У суботу на несанкцыянаваную акцыю выйшла каля 1000 чалавек пад бел-чырвона-белымі сцягамі. Пасля жывога ланцуга ў падтрымку незалежнасці і мітынгу яны пайшлі па вуліцах сталіцы, скандуючы “Незалежнасць” і “Жыве Беларусь!” Міліцыя нікога не затрымлівала.

Тым часам перамовы Лукашэнкі і Пуціна ў Сочы скончыліся нічым.

Але назаўтра, 8 снежня, на пратэсты зноў выйшла каля 1-1.5 тысячы пратэстоўцаў. Яны прынялі рэзалюцыю ў абарону незалежнасці і прайшлі маршам да пасольства Расійскай Федэрацыі, каб уручыць яе.

Сярод выступоўцаў і актыўных удзельнікаў, акрамя Севярынца, былі заўважаныя пісьменнік, грэка-каталік Уладзімір Арлоў, паэт, праваслаўны вернік Уладзімір Някляеў, палітык, грэка-каталік Вячаслаў Сіўчык, заснавальнік парталу “Крыніца.інфо” каталік Максім Гацак, грамадскі дзеяч, евангеліст Аляксей Шэін, кіраўнік Мінскай БХД евангельскі хрысціянін Дзяніс Садоўскі, баптыст, спявак Зміцер Марчук, кіраўнік Маладога Фронту, каталік Дзяніс Урбановіч, святар БАПЦ Леанід Акаловіч ды іншыя. Пратэстоўцы некалькі разоў спыняліся для малітвы да Бога за Беларусь і напрыканцы выканалі гімн “Магутны Божа”.

У цэлым, можна казаць пра вызначальны ўплыў беларускіх хрысціянаў на пратэсты 7-8 снежня.

Паводле ацэнкі “Крыніцы.інфо”, пераважная большасць беларускіх хрысціянаў выступае за незалежнасць Беларусі. Сярод каталікоў і пратэстантаў гэта агульны настрой, падтрыманы святарамі і ерархамі (многія з іх адкрыта аформілі свае акаўнты ў сацыяльных сетках заклікамі “За незалежнасць”). Але нават сярод вернікаў Беларускай праваслаўнай царквы Маскоўскага патрыярхату прыхільнікі аб’яднання Беларусі і Расіі ў адну дзяржаву, паводле нашых дадзеных, знаходзяцца ў меншасці.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
10.12.2019 Беларусь, Грамадства| Тэгі: , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты