Пратэсты супраць інтэграцыі з Расіяй робяцца больш масавымі

Вулічныя пратэсты супраць інтэграцыі з Расіяй, да якіх напрыканцы лістапада заклікаў лідар Беларускай Хрысціянскай Дэмакратыі Павел Севярынец, робяцца ўсё больш масавымі.

20 снежня, калі Уладзімір Пуцін і Аляксандр Лукашэнка сустракаліся ў Санкт-Пецярбургу, у Мінску некалькі тысячаў чалавек сабраліся на Кастрычніцкай плошчы на несанкцыянаваны пратэст “Абаронім незалежнасць!”

Некалькі дзён перад гэтым арганізатараў папярэдніх акцыяў пратэсту, у тым ліку кіраўніка Маладога Фронту Дзяніса Урбановіча і самога Паўла Севярынца, затрымлівалі і судзілі. Дзясяткі людзей атрымалі позвы ў суды. Супрацоўнікі міліцыі прыходзілі дахаты да актывістаў, каб перасцерагчы іх ад удзелу. Афіцыйныя медыі разгарнулі кампанію запалохвання удзельнікаў пратэстаў: іх папярэджвалі, што на Плошчы пройдуць дзіцячыя гулянні ля елкі, магчымая ціскатня, правакацыі і масавыя беспарадкі.

“Советская Белоруссия» параўнала Севярынца з арганізатарамі крыжовых паходаў дзяцей у Сярэднявеччы і абвінаваціла яго ў рэлігійным фанатызме.

У рэальнасці 20 снежня, калі стала вядома пра “збліжэнне пазіцыяў” Пуціна і Лукашэнкі адносна паглынання Беларусі Расіяй, на плошчу Кастрычніцкую ў Мінску выйшла, паводле розных падлікаў, ад 1.5 да 3 тысячаў чалавек пад бел-чырвона-белымі сцягамі.

Пратэстоўцы прайшлі маршам па праспекце Незалежнасці да плошчы Незалежнасці, дзе адбыўся мітынг. Павел Севярынец пачаў мітынг з малітвы “Ойча наш” і зачытаў перад сабранымі зварот Івонкі Сурвілы, старшыні Рады Беларускай Народнай Рэспублікі. Выступілі “дэпутаты незалежнасці” Лявон Баршчэўскі і Сяргей Антончык, кіраўнікі “Народнай Грамады” Мікалай Статкевіч, Партыі БНФ Рыгор Кастусёў, Кансерватыўна-Хрысціянскай Партыі БНФ Алесь Чахольскі ды іншыя.

Затым удзельнікі пратэстаў рушылі да скверу Адама Міцкевіча, прайшлі калонай па вуліцы Нямізе да Зыбіцкай і вярнуліся да Кастрычніцкай плошчы. Там мітынгоўцы выбудавалі “жывы ланцуг” з бел-чырвона-белымі сцягамі і плакатамі ўздоўж праспекту Незалежнасці. Напрыканцы акцыі ўдзельнікі праспявалі гімн “Магутны Божа”.

Затрыманняў не было.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі