Чаму хрысціяне ЗША моляцца за перамогу Трампа? Топ-5 прычынаў.

Засталіся лічаныя дні да афіцыйнага старту прэзідэнцкай кампаніі ў ЗША – лютаўскіх праймерыз Дэмакратычнай партыі у Аёве і Нью-Гэмпшыры. Дэмакраты цягам некалькіх месяцаў вызначаць суперніка для дзеючага прэзідэнта Амерыкі рэспубліканца Дональда Трампа – і праймерыз плаўна перацякуць у бітву двух гігантаў, якая завершыцца сёлета ў пачатку лістапада.

80% евангельскіх вернікаў і каля 50% каталікоў ужо вызначыліся: яны будуць галасаваць за Дональда Трампа. Нават з улікам таго, што лідэр дэмакратычнай гонкі Джо Байдэн – каталік, а фаварыт Аёвы і Нью-Гэмпшыра Піт Буціджыч нясе сваю “евангельскую” рэлігійнасць як сцяг.

Як магло здарыцца, што самазакаханы і грубы нарцыс Дональд Трамп, здольны абразіць у твітары за дзень мільёны сваіх суграмадзян, чалавек, які ненавідзіць СМІ як клас, некалькі разоў жанаты і разьведзены, стаў надзеяй і апірышчам у палітыцы для гіганцкай масы веруючых хрысціянаў у Амерыцы?

Па-першае, Трамп рэспубліканец – а менавіта яны адстойваюць права на жыццё для ненароджаных дзяцей, правы цэркваў, даюць адпор ЛГБТ-лобі і найчасцей выкарыстоўваюць хрысціянскую рыторыку ў выступах.

Па-другое, Трамп выконвае абяцанні. Зніжэнне падаткаў, уздым эканомікі, перагляд нявыгадных гандлёвых пагадненняў з Кітаем і Еўропай, вырашэнне крызісу з мігрантамі, перанос амерыканскай амбасады ў Ізраілі з Тэль-Авіва ў Ерусалім, абарона хрысціянаў, якіх пераследуюць па ўсім свеце – гэта тое, што абяцалі зрабіць бадай што ўсе папярэднія прэзідэнты за апошнія 20 гадоў, і не рабілі. Зрабіў адзін Трамп. Неверагодна, але гэты эксцэнтрычны і несумненна пыхлівы мільярдэр аказаўся бунтаўніком, які ўрэшце выканаў волю бацькі з евангельскай прытчы – у адрозненні ад пай-хлопчыка, каторы паабяцаў ісці працаваць на бацькава поле, а сам не пайшоў.

Па-трэцяе, віцэ-прэзідэнт Трампа Майкл Пэнс. Гэты ня вельмі прыкметны, але дужа ўплывовы сівагаловы палітык насамрэч фармуе хрысціянскі парадак дня ў адміністрацыі Трампа. Сямейны, уцаркоўлены вернік, дасведчаны чыноўнік – ён ціха і няўхільна вядзе евангельскую лінію ва ўрадзе ў маштабе Амерыкі, і гэта працуе.

Па-чацьвертае, суды. Трэцяя галіна ўлады (насамрэч, вельмі важная) дзесяцігоддзямі была апанаваная лібераламі, і хрысціяне ды кансерватары прайгравалі адну эпічную светапоглядную бітву за другой. Трамп некалькімі ключавымі прызначэннямі вярнуў і Вяхоўнаму суду, і судам ніжэйшых інстанцыяў прытомнасць у ідэалагічным плане, і многія хрысціяне былі агаломшаныя гэтай перамогай.

І, нарэшце, па-пятае. Супернікі Трампа. Ніводзін з сур’ёзных прэтэндэнтаў ад дэмакратаў папросту не можа разлічваць на галасы большасці вернікаў Амерыкі. Для Байдэна, Сандэрса, Уорэн даражэй права на аборт, гендарная тэорыя, інтарэсы трансгендараў і лесбіянак, а памянёны вышэй “евангельскі вернік” Піт Буціджыч насамрэч адкрыты гей, які жыве са сваім партнёрам і практыкуе сумнеўную ліберальную тэалогію. Ясна, што цяпер галасаваць за дэмакрата амерыканскія хрысціяне могуць толькі ў страшным сне.

Такім чынам, хрысціяне Штатаў вызначыліся. Што скажа астатняя Амерыка?

 

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
12.01.2020 Грамадства, Меркаванне, У свеце| Тэгі: , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты