Мінскія вернікі просяць улады краіны вярнуць ім Чырвоны Касцёл

Вернікі і святары парафіі святых Сымона і Алены ў Мінску збіраюць подпісы пад зваротам да прэзідэнта з просьбай вярнуць будынак Чырвонага касцёла ва ўласнасць парафіі. Пакуль жа будынак знаходзіцца ва ўласнасці камунальнага прадпрыемства і вернікі павінны плаціць штомесяц падаткаў на 13 тысяч рублёў. Інфармацыя аб зборы подпісаў прагучала падчас прамой трансляцыі набажэнства ў нядзелю 12 ліпеня.

Паводле інфармацыі, што прагучала падчас набажэнства, зараз вядзецца збор подпісаў пад зваротам да прэзідэнта Беларусі, у якім вернікі парафіі касцёла святых Сымона і Алены просяць вярнуць ва ўласнасць парафіі з камунальнай уласнасці гістарычны будынак Чырвонага касцёла і плябаніі (асобнае памяшканне для святароў побач з касцёлам). Таму што пакуль будынак не належыць парафіі, вернікі павінны штомесяц плаціць 13 тыс. рублёў падатку і выплатаў за амартызацыю будынка. За паўгода сума складае 156 тыс. рублёў.

У прамым эфіры трансляцыі набажэнтсва святар ад імя парафіі задаў пытанне ўладам, чаму вернікі павінны плаціць дзяржаве за карыстанне сваім жа будынкам:

«За што мы павінны плаціць нашай дзяржаве 13 тысяч у месяц? Гэта за паўгода 156 тысяч рублёў. За тое, што мы молімся ў сваім касцёле? Слуга Божы Эдвард Вайніловіч будаваў касцёл для людзей, каб яны тут праслаўлялі Бога. І за тое, што мы праслаўляем Бога мы павінны плаціць такія грошы? Людзі добрыя, не ведаю як гэта, не хапае слоў!»

Гэта ўжо не першы зварот вернікаў да ўладаў. Нядаўна парафія атрымала адмову ад Мінгарвыканкама з тлумачэннем, што гэта немэтазгодна — вярнуць будынак вернікам, у якіх ён некалі быў забраны савецкімі ўладамі. Цяпер вырашана звярнуцца вышэй, да прэзідэнта:

«Мы зноў звяртаемся, ужо вышэй да яго, да прэзідэнта нашага, каб ён у канцы канцоў аддаў нам тое, што належыць нам, — сказаў святар падчас імшы. Бо касцёл ніколі не належаў да дзяржавы. У нас ёсць падзел касцёла і дзяржавы».

фота: pixaby.com
фота: pixaby.com

Рэдакцыя Krynica.info звярнулася за каментаром да пробашча парафіі святых Сымона і Алены ксяндза Ўладыслава Завальнюка. Ён падцвердзіў па тэлефоне, што збор подпісаў вядзецца пасля адмовы Мінгарвыканкама вярнуць будынак і мэта новага звароту — дабіцца станоўчага рашэння пытання з маёмасцю вернікаў адной з гістарчынх парафіяў Мінска.

Будынак Чырвонага Касцёла знаходзіцца ў маёмасці камунальнага будаўніча-эксплуатацыйнага ўнітарнага прадпрыемства «Мінская спадчына». Заснавальнікам і органам дзяржаўнага кіравання прадпрыемства з’яўляецца Мінскі гарадскі Савет дэпутатаў у асобе Мінскага гарадскога выканаўчага камітэта. Прадпрыемства займаецца рэканструкцыяй камунальных аб’ектаў, здачай будынкаў у арэнду, аднаўленнем гістарычнага цэнтра Мінска.

У прыёмнай дырэктара прадпрыемства «Мінская спадчына» адмовіліся каментаваць сітуацыю, якая разгарнулася вакол Чырвонага касцёла. Начальнік аддзела арэндных адносін Крысціна Іюньская ад каментарыяў таксама адмовілася, але патлумачыла, што Чырвоны Касцёл не з’яўляецца арэндатарам: «Арэнда ў іх бязвыплатная». Чырвоны Касцёл плаціць толькі падатак.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
13.07.2020 Беларусь, Навіны цэркваў| Тэгі: , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты