Евангельскія цэрквы па ўсёй краіне абвяшчаюць пост і малітву за Беларусь

iStock-820859670-e1580413311495

Кіраўніцтва трох асноўных евангельскіх дэнамінацый Беларусі заклікалі вернікаў да супольнага посту і малітвы за Беларусь. У прыватнасці, хрысціяне веры евангельскай і евангельскія хрысціяне баптысты прызначылі дні посту і малітвы на 2 жніўня і 26 ліпеня.

Савет Біскупаў Аб’яднанай Царквы ХВЕ абвесціў агульны пост і малітву за надыходзячыя выбары прэзідэнта 9 жніўня. “Як хрысціяне і як грамадзяне Беларусі аб’яднаемся ў посце і малітве 2 жніўня 2020 года аб тым, каб было сумленнае і справядлівае правядзенне выбараў, каб быў абраны найбольш годны кандыдат на пасаду Прэзідэнта Беларусі, які будзе мудра і справядліва кіраваць нашай краінай. Будзем маліцца аб міры і дастатку для нашага народа не толькі ў абвешчаны дзень посту, але і на працягу ўсяго часу, што застаўся да выбараў”, – звяртаецца Савет біскупаў да вернікаў.  

Саюз ЕХБ прызначыў супольны пост і малітву ў сувязі з прэзідэнцкімі выбарамі  на 26 ліпеня. “Дарагія браты і сёстры! Просім вас у сувязі з выбарамі аб’яднацца ў малітве за нашую краіну, за збаўленне людзей, як раіць апостал Павел у 1-м пасланні да Цімафея 2:1-4. “Маліцеся за беларускі народ, за мір і дабрабыт на нашай зямлі, за перамогу справядлівасці і міласэрнасці”,  – сказана ў звароце Саюза ЕХБ.

Нагадаем, што нядаўна пра пост і малітву за Беларусь аб’явіла і Аб’яднанне цэркваў хрысціянаў поўнага Евангелля ў Беларусі.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі