Беларускія католікі звярнуліся да святароў з просьбай маліцца за сумленныя выбары

110308784_119761879807177_1652966309631939280_o

Каталікі Беларусі апублікавалі зварот да святароў у сацыяльных сетках. У ім яны заклікаюць святароў у супольных малітвах і казаннях надаваць больш увагі тэме сумленных выбараў.

Паважаныя святары!

Ад імя католікаў нашай Бацькаўшчыны звяртаемся з просьбаю аб цэлебрацыі святых Імшаў і правядзенні іншых малітоўных набажэнстваў у інтэнцыі сумленных выбараў у нашай краіне.

Мы горача верым і адчуваем, што такая малітоўная падтрымка, падтрымка ў выглядзе малітвы з заклікам да сумленнасці і неабыякавасці павінна загучаць ва ўсіх касцёлах і капліцах нашай Беларусі.

Малітва да Святога Духа, моц эўхарыстычнай ахвяры на Божым алтары, моц ружанцовай малітвы і іншыя малітоўныя практыкі натхнялі і ўмацоўвалі многія народы ў важныя гістарычныя моманты, ядналі людзей у духу.

Таму менавіта звяртаемся да святароў, як да нашых духоўных правадыроў, якія дапамогуць аб’яднаць наш народ у духу малітвы і Хрыстовай любові адзін да аднаго асабліва ў гэты час.

Таксама заахвочваем падчас нядзельных казанняў узняць тэму справядлівых выбараў і ўдзелу ў іх каталіцкіх вернікаў – паводле Божага закону, які большы за загады часовай дзяржаўнай улады. Адзначыць, што паводле вучэння касцёла, вернікі павінны ўдзельнічаць ў палітычных і грамадскіх працэсах, браць адказнасць на сябе.

Горача прагнем, каб гэта малітоўная падтрымка агарнула ўсю нашу Бацькаўшчыну, а таксама і беларусаў Замежжа, якія з усіх куткоў свету змогуць таксама разам з намі маліцца анлайн. Будзем разам маліцца за магчымасць здзейсніць правільны выбар, быць і ў малітве, і ў справе адданымі сынамі і дочкамі сваёй Айчыны.

Запрашаем:

– Цэлебраваць св. Імшу ў інтэнцыі сумленных выбараў і добрай будучыні для народа
– Падчас казанняў уздымаць тэму выбараў, свядомага і адказанага ўдзелу ў іх вернікаў – згодна з Божым законам
– Рабіць рэпосты з нашай старонкі, пісаць ў сацсетках каментары, распаўсюдзіць інфармацыю аб кампаніі праз парафіяльныя групы ў Вайберы і сацсетках
– Размясціць на парафіяльных дошках абвестак інфармацыю аб кампаніі за сумленныя выбары.

Гэта і ёсць наша каталіцкая перадвыбарчая праграма – маліцца за сумленныя, свабодныя і справядлівыя выбары.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
17.07.2020 Грамадства| Тэгі: , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты