Калі ты ўсяго толькі вернік і палітыка не для цябе, паслухай!

Гвалт і насілле ў Беларусі не спыняюцца і гэта страшна. Але яшчэ больш палохае тое, што нават гэта праяўленне беззаконня, якое становіцца абыдзеннасцю ў грамадстве, некаторыя нібыта здольныя праглынуць.

А той-сёй і сам здзейсняе беззаконні так, як быццам бы ўлада ніколі не зменіцца і не прыдзецца адказваць за злачынствы.

Хтосьці паслухае мяне, ды скажа: хто пра што, а ксёндз Барок ізноў пра сваё, а ці не мог бы ён штосьці іншае казаць, апроч як пра насілле ды беззаконне?

Я безумоўна мог бы, ды не буду.

А вы вось калі думаеце, што правасуддзе і справядлівасць гэта не ваша справа, бо клопат веруючых маліцца, пасціць ну і чыніць міласьціну, то Слова Божае моцна вас расчаруе.
Бог яшчэ праз прарока Ісаю адказваў на пытанні вось такіх “вернікаў”, якія ўсклікалі: “чаму мы посьцім, а Ты ня бачыш? упакорваем душы свае, а Ты ня ведаеш?” (Іс 58, 3)

Адказ Бога быў вельмі просты: “ у дзень посту вашага вы выконваеце волю вашу… вы посьціце … дзеля таго, каб дзёрзкаю рукою біць іншых…” (Іс 58, 3.4)

Гэта ўсё пра Вас, якія называеце сябе хрысціянамі і кажаце: “я не лезу ў палітыку, ды не хачу нічога ведаць пра сілавікоў, пратэстуючых, у мяне сваё жыццё і мне і так добра”.

Калі ты хрысціянін і, напрыкдад, католік ды абмінаеш палітыку, як нейкае зло, то ведай, што папа Францішак казаў: “добрыя католікі ўмешваюцца ў палітыку даючы лепшае з сябе”.

Пытанне ці добры ты католік і наогул ці хрысціянін, калі абыякавасць да сацыяльнага беззаконня, для цябе з’яўляецца нормай і не ўваходзіць у сферу тваіх інтарэсаў.

(Тут пабачыш пра неабыякавасьць хрысціян).

“Палітыка, — казаў Папа — згодна з Сацыяльным вучэннем Касцёла, з’яўляецца адной з найвышэйшых формаў любві, бо служыць агульнаму дабру.”

Зло з’яўляецца тады, калі ты з палітычнай дзейнасці хочаш атрымаць узнагароду тут і цяпер, а не ў Валадарстве Божым.

Тады так, лепш такой палітычнай дзейнасцю не займацца. Бо гэта падобна як і пад час цялеснай формы любві, калі займацца за грошы, то замест узнёслага кахання атрымоўваецца ўдзел у прастытуцыі. А гэта грэх.

Грэх таксама, калі ты хрысціянін займаешся бруднай і пасіўнай палітыкай: молішся і пры гэтым цалуешся з тымі ў каго рукі ў крыві. Дарэчы, скажы мне, а чым ты адрозніваешся ад Іюды, які здрадзіў Хрыста.

Ён таксама маліўся, прычашчаўся, цалаваў Збаўцу. А вера ў Хрыстовую ўсемагутнасьць у яго была можа нават мацнейшая, чым твая або мая. Бо Іюда, як кажуць некаторыя, пагадзіўся здрадзіць Хрыста, не таму, што ён не верыў у Сына Божага, але таму,што калі браў грошы думаў: возьме свае 30 сярэбрэнікаў, а Хрыстос і так справіцца са сваімі ворагамі. Ён жа Бог. А ён Іўда, чалавек маленькі, проста заробіць разок і усё. Ну хто ж з нас не любіць хуткіх ды лёгкіх грашэй.

Атрымоўваецца сёння, каб зарабіць свае сярэбрэнікі, хтосьці з дня ў дзень чалавека лупцуе дубінкай. Хтосьці ўсяго толькі з апушчанай галавой ходзіць на працу і заплюшчвае вочы, калі трэба выканаць амаральны загад начальніка, бо думае, што яго хата с краю. Хтосьці моўчкі чакае, каб хучэй дажыць месяц і атрымаць чарговую пенсію. Гэта ўсё вобразы паводзінаў сучасных Іюдаў.
Калі гэта пра вас, то ведайце, што ў вачах Божых, Вы – нічога не вартыя. Вы- як дзікія ягады на вінаградніку. З прыпавесці прарока Ісаі пра Божы вінаграднік, вас, згодна з прароцтвам, чакае спусташэнне і знішчэнне. Вы не маеце будучыні.

Бо Госпад ад нас спадзяецца іншага. Ісая ў прыпавесці пра вінаграднік кажа: “Ён чакаў правасуддзя — і вось беззаконне; чакаў справядлівасці — і вось крык.” (Іс 5,7).

А той жа, хто не хоча быць Іўдай, выконвае волю Бога і застаецца чалавекам, ды як умее так і пратэстуе супраць насілля і беззаконня; таксама няма чаго паддавацца роспачы і сумнявацца ў перамозе дабра над злом.

Апостал Павел кажа: “Не аб чым, не турбуйцеся”. (Флп 4,6). Звяртаецца да тых, хто жыве па веры.

Выканаў волю Божую, памаліўся ў храме, схадзіў на марш пратэсту заступіўся за палітвязняў і, не парушыў закон, так чаго ж табе турбавацца: няхай роспачы паддаюцца і баяцца тыя, хто хавае сёння свае твары перад Божым святлом.
(Апамяйтацеся, пакуль не поздна. Выбірайце: Валадарства Божае або людзкі трыбунал.)

Яны маюць прычыны хавацца і баяцца, але не мы, якія намагаемся праўды і справядлівасці.

Па веры нашай будзе нам. Перамога чакае таго, хто ў яе верыць.

 

а. Вячаслаў Барок

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі