Ганаруся знаёмству з “злачынцымі-вязнямі”. Пра пераслед хрысціянаў

Ніколі не падумаў бы, што буду ганарыцца знаёмству з людзьмі, трапіўшымі за краты.

Бо гэта нібы закадавана ў кожным з нас: не вядзіся з турэмшчыкамі.
Аднак код, у якім прапісана, што “злачынца павінен сядзець у турме”, сёння паспяхова зламаны. І сталася нормай, што найчасцей за краты трапляюць пацярпелыя, а злачынцы- надалей пазастаюцца на свабодзе.

Падавалася б, што хрысціянін ў Беларусі ніколі не сустрэнецца з пакараннем з боку дзяржавы толькі за тое, што ён моліцца. Малітва не можа быць прадметам злачынства або правапарушэннем. Аднак, досвед апошніх месяцаў сцвярджае адваротнае. Можа.

“Хрысціянская візія”- беларускае аб’яднанне вернікаў з усіх канфесій, фіксуе такія анамальныя факты і супольна выказвае пратэст адносна незаконных пакранняў хрысціян.

І тут немагчыма не заўважыць, што хрысціяне, пацярпелыя ад несправядлівых прысудаў улады, з’яўляюцца нямым выклікам ад Бога, скіраваным да кожнага чалавека, які лічыць сябе вернікам і хрысціянінам.
Бог праз іх задае пытанне кожнаму з нас: Хрысціянін, дзе ты? Гэтае пытанне сугучна з пытаннем: “Адам, дзе ты?” Яно прагучала пасля таго, як чалавек сам учыніў зло.

Незаконныя пакаранні хрысціянаў за малітву і за праяўленне сваіх перакананняў- гэта зло, у цэнтры яго ёсць ўсё грамадства. І калі ты не выступаеш яўна супраць зла, то адразу пераходзіш на ягоны бок, з той толькі розніцай, што хтосьці гэта робіць пасіўна, а хтосьці актыўна. І таму Бог сваім пытаннем “дзе ты?”, не дапускае ніякага нейтралітэту але патрабуе вызначыцца са сваёй пазіцыяй.

Асабіста я не хачу быць памагатым у пераследаванні хрысціян за учынкі, вытокам якіх стала іх вера ў Бога, і таму праяўляю салідарнасць з усімі пакаранымі хрысціянамі.

(Я зрабіў свой выбар, а ты паглядзі відэа).

Я салідарны…

Я салідарны з каталічкай Ірынай Бернацкай з Ліды: яна за ружанцовую малітву, за вяртанне мітрапаліта, каля касцёла, атрымала штраф 810 рублёў.

Я салідарны з грэка-каталічкай Марынай Булатоўскай з Віцебска, за малітву Вяночак да Божай Міласэрнасці, якая атрымала штраф 4 базавыя.

Я салідарны з хрысціянкай Аленай Гнаук з Брэста, якая, за малітву на каленях у прысутнасці сілавікоў, атрымала штраф 810 рублёў, а перад гэтым адседзіла 15 сутак.

Я салідарны з сям’ёй старавераў Сняжковых з Гомеля: у іх сям’і пакараныя былі ўсе, нават дзеці, якія патрапілі ў прытулак, бо бацькоў зняволілі.

Я салідарны, з музыкамі-католікамі хрысціянскага гурта Laudans Андрэем Лугіным і Аленай Палачанскай, якія атрымалі па 15 сутак, бо спявалі і маліліліся ў адным з мінскіх двароў.

Я салідарны з святарамі. Пратэстанцкім пастарам з Мінска Тарасам Цялькоўскім, які быў аштрафаваны, і праваслаўнымі святарамі а. Уладзімірам Драбышэўскім з Гомеля, двойчы асуджаны сумарна на 25 сутак; ды з двойчы судзімым а. Аляксандрам Богдан з Ваўкавыска.

Урэшце, я салідарны з мітрапалітам Тадэвушам Кандрусевічам, які за выкананне сваіх пастырскіх абавязкаў, быў пакараны прымусовым выгнаннем з Радзімы.

Узгадваючы імёны гэтых розных людзей з усёй Беларусі, я радуюся за наш высакародны народ. Хрыстос казаў: “Шчаслівыя вы, калі ўзненавідзяць вас людзі, і калі адрынуць вас, і будуць зневажаць, і з-за Сына Чалавечага адкінуць імя вашае, як зло. Радуйцеся ў той дзень і весяліцеся, бо вялікая ўзнагарода ваша ў небе.” (Лк 6, 23-24).

А значыць і мы, Беларусы, будзем шчаслівыя.
Сёння кожны робіць свой выбар, некаторыя пакуль стаяць перад ім. Думаюць, вагаюцца, апраўдваюцца, бо так цяжка зрабіць правільны выбар і адказаць на пытанне “дзе ты?”.

І безумоўна згаджуся з тымі, хто кажа: праўда прамалінейная і абмежаваная праўдай, абіраючы яе бок, вельмі цяжка перамагчы ў супрацьстаянні з хлуснёй, здольнай шмат чаго прыдумаць. І гэта так. Але ж згадзіцеся, што і зло заўжды тупое і бязлікае, яно як правіла схаванае за маскай-балаклавай, а дабро наадварот крэатыўнае і шматаблічнае.

Здольнае знайсці сотні магчымасцяў для праяўлення любві і сваёй адназначнай пазіцыі.

Робячы выбар, не памыліся. Абірай дабро, праяўляй салідарнасць з тымі, хто церпіць за Хрыста і праўду.

а. Вячаслаў Барок

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі