Царква захварэла

 

Па стане здароўя, 9 чэрвеня 2021 г. Гродненскага праваслаўнага архібіскупа Арцемія, ўчора чальцы Сіноду БПЦ адправілі на спачын. І ўчора ж, у паспешлівай форме Сінод РПЦ у Маскве гэтае ж рашэнне зацвердзіў.

“Па стане здароўя”– лічу, што  гэта фармуліроўка вельмі ёсць трапная і праўдзівая. Уладыку адправілі па стане здароўя, але стан здароўя падвёў не іерарха, а Царкву. Гэта падзея высветліла, што сур’ёзна захварэла Царква.  Сам жа Арцемій, вядома, праблемы са здароўем мае, але, як паказаў апошні год, тыя праблемы 68-гадоваму іерарху ніяк не заміналі служыць у Царкве на хвалу Бога і для дабра Беларусі, і мог бы яшчэ далей служыць аж да 75 год свайго жыцця. Акурат у такім узросце звычайна іерархі ідуць на пенсію. Гэта яго людзі называлі сумленнем БПЦ. Гэта яго пропаведзі на ютуб набіралі найбольш праглядаў з-пасярод усіх іншых іерархаў праваслаўных у Беларусі.

Гэта яго таксама слухалі каталіцкія святары, ды той сёй з духавенства рэўнасна заўважаў, што ў католікаў няма такога іерарха, каб так проста і ясна  выказваўся пра праблемы грамадска-палітычнага крызісу ў Беларусі.

Я таксама на сваім ютуб канале не раз узгадваў імя біскупа Арцемія ды цытаваў яго словы.

Так у відэа “Як праваслаўнаму прыняць каталіцтва? Хто бліжэй Бога і народу? | Церковь или Костёл?” я, адказваючы на надысланае мне пытанне аб пераходзе з праваслаўя на каталіцызм, заахвочваў лепш пазнаёміцца з праваслаўнымі святарамі. Звяртаў увагу на біскупа Арцемія як пастыра, які верыць у Бога ды моцна і ясна навучае Божай Праўдзе.

У відэа “Рубікон. Я святар Хрыстовы, а не “дорогой священнослужитель Лукашенки” цытаваў біскупа Арцемія і ўзгадваў словы, якія прагучалі з яго вуснаў ў Гродна ў афіцыйным звароце да вернікаў пасля фальсіфікацыі выбараў і выбуху насілля: “кроў ахвяраў і цяжкія пакуты людзей у гэтыя дні на сумленні тых, хто свядома сам забіваў або прымушаў іншых забіваць праўду!”

У відэа “Дакуль Бог будзе цярпець катаванні сілавікоў над беларусамі?” спасылаўся на яго словы, якія ахвотна зацытую: «Вам на каленях трэба стаяць за ўсе фальсіфікацыі, за тую хлусню, якую вы піхалі нашым дзецям! За гэты БРСМ, за камсамол, за ўсё, што было… атэістычнае».

Вось атрымоўваецца на спачын адправілі таго, хто прапаведваў, а той хто маўчыць, далей пазастаецца ў шэрагах дзейсных. І гэта дае падставу цвердзіць, што на спачын Уладыку Арцемія сапраўды адправілі па прычыне хваробы- але хварэе Царква. Гэта хвароба рэальна перашкаджае БПЦ служыць на хвалу Богу і для дабра народа. Бо служба рэжыму і сваім меркантыльным інтэрэсам, гэта зусім не тое.

Чаму ж мяне, каталіцкага ксяндза, наогул цікавіць лёс Уладыкі Арцемія і БПЦ. Таму што Царква Хрыстова ў нас адна, хоць і розныя канфесіі. Апостал Павел усім хрысціянам казаў так: “Вы – цела Хрыстовае, а паасобку – члены.” (1Кар 12, 27) Ды прасіў, “каб усе члены аднолькава клапаціліся адзін пра аднаго.Таму, калі пакутуе адзін член, то з ім пакутуюць усе члены; і калі славіцца адзін член, то з ім радуюцца ўсе члены” (1 Кар 12,25-26)

Вось таму я і перажываю за БПЦ, бо за Касцёл Каталіцкі перажываю і за ўсіх хрысціянаў.
А калі ж хварэе адна Царква, то магчыма і другая таксама хварэе, бо хвароба заразная. І гэты сіндром – падпарадкоўвацца не Богу  і Праўдзе Евангелля, але зямной уладзе, можа хутка перакінуцца і на Касцёл Каталіцкі…

Я перажываю і клапачуся аб здароўі усіх хрысціянскіх супольнасцяў, бо як ачуняюць нашыя Цэрквы ад духа нематы, то і грамадства нашае паздаравее. І на пенсіі адправяць не прапаведнікаў, якія прапаведуюць, але тых, хто даўно перастаў выконваць свае абавязкі перад народам.

Вячаслаў Барок

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі