На смерць грамадзяніна

У Рымскай імперыі было два ўзроўні ганенняў на ранніх хрысціянаў.

Першы – рэлігійны – чынілі ўлады Юдэі, якія ўспрымалі вучняў Хрыста ў якасці небяспечных сектантаў.

Другі – палітычны – чынілі ўжо ўлады самой імперыі. Для Рыму, які захапіў шмат розных народаў і краінаў, было няважна, хто і ўва што верыць. Яны самыя ахвотна пераманьвалі да сябе чужых багоў, запазычвалі грэцкі і этрускі пантэоны, далучыліся да культаў егіпецкай Ізіды ці персідскага Мітры. Галоўнае для ўладаў Рыму – палітычная лаяльнасць: вер у каго хочаш, але прынясі ахвяру статуі імператара. Максіма, якой дыктатарскія рэжымы трымаюцца тысячагоддзямі.

Калі ты не можаш прынесці такую ахвяру, праследуй, калі ласка, на крыж ці на арэну цырку.

Таму хрысціяне, якія з рэлігійных прычынаў не маглі ўкленчыць перад статуяй імператара, аўтаматычна рабіліся палітычнымі злачынцамі. Адсюль і такія масавыя ганенні на іх у першыя тры стагоддзі імперыі.

Ахвярамі такога пераследу сталі і апосталы Пятро і Павел. Апошні, будучы аўтарам знакамітай фразы пра “ўсялякая ўлада ад Бога”, якая стагоддзямі падзяляе інтэрпрэтацыі багасловаў, рэгулярна выкарыстоўваў сваё рымскае грамадзянства, якое ў ягоныя часы яшчэ было рэдкасцю, у якасці абароны.

Гэтак, менавіта праз грамадзянства Рыму яго вызвалілі пасля затрымання ў Філіпах. Праз рымскае грамадзянства яго не здолеў пакараць смерцю Сінедрыён. Як рымскі грамадзянін ён быў абезгалоўлены, а не ўкрыжаваны, як той жа Пятро. Так што, апостал Павел не грэбаваў карыстацца законамі ў сваю абарону ад беззаконня. З гэтай нагоды яго нават можна лічыць першым хрысціянскім праваабаронцам.

Дый выкарыстанне грамадзянства для сваёй абароны паказвае, што апостал Павел лічыў, што хаця ўсялякая ўлада і ад Бога, яна самая павінна выконваць свае ж законы.

У гэты дзень памяці апосталаў Пятра і Паўла я ж жадаю вам згадаць свае грамадзянскія правы, прапісаныя ў тым ліку і ў Канстытуцыі.

Rerum Novarum

 

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі