Папа Францішак растлумачыў матывы новага падыходу да «трыдэнцкай» Імшы

Святы Айцец спадзяецца, што дзякуючы прыпыненню «аўтаматычнага» дазволу на цэлебрацыю Імшы паводле старога абраду з’явіццца магчымасць вярнуцца да сапраўдных намераў Бэнэдыкта XVI і Яна Паўла II.

Ілюстрацыйнае фота: Vincenzo Pinto.

Як паведамляе Беларуская рэдакцыя парталу Vatican News, Папа Францішак закрануў гэтую тэму падчас сустрэчы са славацкімі езуітамі 12 верасня ў Браціславе. Стэнаграма размовы з’явілася ў італьянскім часопісе La Civiltà Cattolica.

Святы Айцец нагадаў, што яго рашэнне «стала вынікам кансультацый з біскупамі з усяго свету», якія праходзілі ў 2021 годзе.

«З гэтага часу тыя, хто хоча цэлебраваць паводле vetus ordo, павінны прасіць згоды ў Рыме, як гэта адбываецца з бірытуалізмам.

Але ёсць маладыя святары, якія ідуць да біскупа прасіць гэтага праз месяц пасля пасвячэння», — звярнуў увагу пастыр паўсюднага Касцёла.

Папа распавёў пра кардынала, да якога прыйшлі два новапрэзбітэры з просьбай аб магчымасці вывучэння лацінскай мовы для добрай цэлебрацыі «трыдэнцкай» Імшы.

«А ён з пачуццём гумару адказаў: „Але ў дыяцэзіі так шмат лацінаамерыканцаў! Вывучайце іспанскую мову, каб прапаведаваць ім. Тады, калі вы вывучыце іспанскую мову, вярніцеся да мяне. Я скажу вам, што ў дыяцэзіі шмат в’етнамцаў, і я папрашу вас вывучыць в’етнамскую мову. А калі вы вывучыце в’етнамскую мову, я дам вам дазвол на вывучэнне лацінскай мовы“. Такім чынам ён іх „прызямліў“, вярнуў на зямлю. Я іду наперад не таму, што хачу зрабіць рэвалюцыю. Я раблю тое, што лічу патрэбным.

Гэта патрабуе шмат цярплівасці, малітвы і вялікай любові», — заўважыў Пантыфік.

Сatholic.by

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі