У Лідзе ўрачыста адзначаць 100-годдзе служэння ў Беларусі сясцёр з Кангрэгацыі дачок Марыі Беззаганнай

У суботу 20 лістапада ў Лідзе сёстры з Кангрэгацыі дачок Марыі Беззаганнай урачыста адзначаць 100-годдзе свайго служэння на тэрыторыі сучаснай Беларусі.

Касцёл Святой Сям’і ў Лідзе. Фота: Фотоэнциклопедия Беларуси

Як паведамляе Grodnensis.by, цэтрам святкавання стане парафія Святой Сям’і ў Лідзе (вул. Гастэлы, 22–1), пры якой нясуць служэнне сёстры з гэтай законніцкай супольнасці.

Пачатак урачыстай святой Імшы ў 12.00.

Кангрэгацыя дачок Марыі Беззаганнай была заснавана ў літургічны ўспамін Ахвяравання Найсвяцейшай Панны Марыі 21 лістапада 1891 года ў Закрочыме (Польшча) благаслаўлёным Ганаратам Казьмінскім пры ўдзеле Валерыі Людвікі Гасяроўскай для праслаўлення Беззаганнага Зачацця Панны Марыі. Кожная законніца гэтай супольнасці з першых дзён манаскага жыцця становіцца ўласнасцю Марыі.

Сёстры прыносяць сябе ў ахвяру Маці Божай як прыладу для выратавання бліжніх малітвай і працай у патрэбах душы і цела, а таксама ўласным прыкладам. Яны пакліканы быць анёламі-ахоўнікамі для жыхароў тых месцаў, дзе служаць кожны дзень.

Хоць сёстры гэтай законніцкай супольнасці не носяць адмысловага манаскага адзення (габіту), яны вядуць жыццё, уласцівае ўсім кансэкраваным асобам, у чыстасці, убостве і паслухмянасці.

Сёстры Кангрэгацыі дачок Марыі Беззаганнай нясуць служэнне ў Лідзе, а таксама пры парафіі святога Мікалая, біскупа, у Свіры (Мінска-Магілёўская архідыяцэзія).

Catholic.by

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі