У межах падрыхтоўкі да свята ў гонар святога апостала Андрэя беларускія грэка-католікі маліліся за праваслаўных братоў

Перад святам святога апостала Андрэя Першапакліканага, якога асаблівым чынам ушаноўваюць хрысціяне візантыйскай традыцыі, у супольнасцях беларускіх грэка-католікаў праходзіла душпастырская навэнна — шлях духовага подзвігу і падрыхтоўкі да ўрачыстасці.

Фота Віктара Ведзеня

Як паведаміў сайт грэка-каталіцкай парафіі святога і праведнага Язэпа ў Мінску Svjazep.org, дні навэнны з 25 па 27 лістапада былі асаблівым чынам прысвечаны малітве за праваслаўных братоў і сясцёр перад пачаткам Перадкаляднага посту, што распачаўся ў Праваслаўнай Царкве 28 лістапада.

Як адзначаецца на сайце, ідэя абвяшчэння апостала Андрэя Апекуном (Заступнікам) братэрскага дыялогу паміж хрысціянамі заходняй і ўсходняй традыцыі належыць святому Папу Паўлу VI. Яна нарадзілася ў час яго сустрэчы з Сусветным Патрыярхам Афінагорам на Святой Зямлі ў 1965 годзе. Гэтая ініцыятыва была прынятая Патрыярхам Афінагорам, які адказаў на яе ў размове з французскім праваслаўным багасловам Аліўе Клеманам улетку 1968 года. Гэтыя размовы былі выдадзены ў 1969 годзе ў форме кнізе пад загалоўкам ROMAAMOR (лац. «Рым — любоў»).

«Малітвамі Апостала Андрэя Першапакліканага няхай Госпад даруе нам у Беларусі плённы міжканфесійны дыялог для духоўнага дабра ўсіх жыхароў шматканфесійнай Беларусі», — такі кароткі малітоўны заклік змешчаны на сайце сталічнай грэка-каталіцкай парафіі, якую з нагоды свята святога апостала Андрэя 28 лістапада наведаў Апостальскі нунцый у Беларусі арцыбіскуп Антэ Ёзіч.

Сatholic.by

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі