Брэст: грэка-католікі разам з пратэстантамі адзначылі 500-годдзе з часу выдання «Малой падарожнай кніжыцы» Скарыны

20 студзеня ў грэка-каталіцкай царкве святых братоў апосталаў Пятра і Андрэя адбылася экуменічная малітоўная сустрэча з нагоды 500-годдзя з часу выдання «Малой падарожнай кніжыцы» Францішка Скарыны, надрукаванай у Вільні ў 1522 годзе.

Фота: Беларуская грэка-каталіцкая газета «Царква»

Як паведаміў сайт беларускай грэка-каталіцкай газеты «Царква», на запрашэнне прыняць удзел у экуменічнай сустрэчы падчас Тыдня малітваў аб адзінстве хрысціянаў адгукнуліся сем пастараў розных евангельскіх супольнасцяў з Брэста і Кобрына разам з вернікамі.

На пачатку сустрэчы прысутныя разам памаліліся, прачытаўшы шэраг псальмаў з Псалтыра ў беларускім перакладзе айца Аляксандра Надсана.

Потым са словам да прысутных звярнуўся пробашч грэка-каталіцкай парафіі ў Брэсце айцец Ігар Кандрацьеў, які падкрэсліў важнае значэнне Бібліі і яе перакладаў на сучасныя мовы ў жыцці вернікаў. Святар адзначыў вялікі ўнёсак Францішка Скарыны ў паглыбленне малітоўнага жыцця нашых продкаў, расказаў пра асветніцкае значэнне выдавецкай і перакладчыцкай дзейнасці беларускага першадрукара, які праз свае выданні імкнуўся зрабіць даступным Слова Божае для кожнага.

«Прыклад Скарыны і сёння натхняе беларускіх перакладчыкаў на новыя пераклады Бібліі на сучасную беларускую мову. Пры гэтым кожны перакладчык заўсёды прапускае Слова Божае з Бібліі праз сябе і такім чынам уступае ў дыялог з Богам. Без сумневу, вёў такі дыялог з Богам і Францішак Скарына, калі рыхтаваў да друку свае пераклады кніг Бібліі», — сказаў грэка-каталіцкі святар.

Перад прысутнымі выступілі таксама пратэстанцкія пастары. Пастар з царквы «Збаўленне» Аляксандр Барысюк расказаў пра асветніцкія праекты «Біблія на Берасцейшчыне» і «Беларускія пераклады Бібліі», якія ладзіліся ў Брэсцкай абласной бібліятэцы і ў Нацыянальнай бібліятэцы Біларусі ў Мінску з удзелам прадстаўнікоў розных канфесій. Яны могуць служыць прыкладам экуменічнага супрацоўніцтва, бо Біблія — гэта тое, што яднае ўсіх хрысціянаў.

«І сёння Біблія павінна быць нашай „падарожнай кніжкай“», — падкрэсліў пастар.

Яго калега Юрый Аліеў расказаў, як да яго ў савецкія часы патрапіла першая Біблія. Гэта адбылося падчас яго знаходжання ў Нарвегіі, калі ён служыў мараком, і з таго часу Святое Пісанне назаўжды ўвайшло ў яго жыццё.

Прысутных на экуменічнай сустрэчы прывітаў таксама пастар з Кобрына Сяргей Самулевіч. Айцец Ігар Кандрацьеў прачытаў адну з малітваў з «Малой падарожнай кніжыцы», напісаную самім Францішкам Скарынам — да Хрыста ўкрыжаванага. Потым, узяўшыся за рукі, усе прысутныя на экуменічнай сустрэчы разам прачыталі малітву «Ойча наш».

Сустрэча яшчэ доўга працягвалася ў нефармальнай прыязнай атмасферы за гарбатай. Прысутныя дзяліліся досведам свайго рэлігійнага жыцця, разважалі над асобнымі ўрыўкамі і складанымі месцамі ў Бібліі, адказвалі на розныя пытанні, у тым ліку пра жыццё і дзейнасць Францішка Скарыны.

Экуменічная малітоўная сустрэча ў брэсцкай грэка-каталіцкай царкве праходзіла ў межах Тыдня малітваў аб адзінстве хрысціянаў, які штогод адзначаецца 18–25 студзеня, і стала своеасаблівай падзякай вернікаў розных канфесій Францішку Скарыну за яго асветніцкую працу ў пашырэнні Божага слова.

Сatholic.by

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
24.01.2022 Беларусь| Тэгі: , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты