У «Новым Жыцці » правялі асаблівы баль для асаблівых людзей

В Новой жизни

Вернікі царквы «Новае Жыццё»  18 лютага правялі баль «Night to shine» альбо «Час зіхацець» — баль для людзей з асаблівасцямі.

Галоўным арганізатарам балю стала Вольга Ганчарэнка. «Я даведалася пра гэты праект тры гады таму, і ён мяне вельмі натхніў. Тады я паглядзела відэяролік пра баль для людзей з асаблівасцямі, пабачыла шчырыя, неперадавальныя эмоцыі ўдзельнікаў, якія не бачыла больш нідзе. Да мяне прыйшло вялікае жаданне прывезці гэты праект у Беларусь і зрабіць баль для нашых людзей. Мяне спынялі маштабы падзеі, бо баль праводзіца на вельмі высокім узроўні. Патрэбная была падтрымка каманды і царквы. Калі ўсё гэта атрымалася, мы пачалі рыхтавацца», — распавядае Вольга Ганчарэнка.

Большасць з удзельнікаў свята ніколі раней не была на балі. Кожнаму з гасцей дапамагаў свой валанцёр.

«Сярод валанцёраў ёсць бізнесоўцы, дырэктары і нават дэпутаты. Гэта людзі, якія, прыйшоўшы на праект, робяцца рукамі, нагамі, вушамі нашых гасцёў. Самі валанцёры не застаюцца ранейшымі, яны мяняюцца знутры. Баль зладжаны так, што ў кожнага госця ёсць свой валанцёр-сябра. Цягам вечара ён удзельнічае з госцем ва ўсіх мерапрыемствах. І многія валанцёры пасля сканчэння балю працягваюць сябраваць і камунікаваць з нашымі гасцямі, і гэта вельмі каштоўна», — распавядае Вольга.

Кожнага госця прыгожа апранаюць, робяць макіяж і фрызуру, арганізоўваюць транспартную дастаўку. Госці прыязджаюць на белых лімузінах, ідуць у залю па чырвонай дарожцы, атрымліваюць бутан’ерку з жывых кветак, распавядае сайт  царквы.

На гэты раз на баль прыехалі каля 20 інвалідаў-вазочнікаў. Усяго сабралася 70 гасцей і 90 валанцёраў. Для ўдзельнікаў балю выступалі скрыпач Давід Бэй, выканаўцы Аляксандр Патліс і Стэфанія Сакалова. З кранальным казаннем да гасцей звярнуўся пастар Вячаслаў Ганчарэнка.

«Калі заходзіць размова аб людзях з абмежаванымі магчымасцямі, аб маламаёмасных, аб шматдзетных сем’ях, аб сіротах, гучыць меркаванне, што ім «і так сыдзе». Што ім можна раздаць адзенне горш, уручыць пратэрмінаваную гуманітарку. У грамадстве ёсць устаноўка, што ім «хоць нешта». А мы жадаем зрабіць для іх самае лепшае. Таму ёсць лімузіны і чырвоная дарожка. Як бы мы сустракалі Езуса, як бы сустракалі найважнейшага і дорага госця, так мы прымаем і нашых гасцей на баль. Толькі самае лепшае, толькі самае прыгожае», — распавядаюць арганізатары балю.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі