Кіраўнік украінскіх грэка-каталікоў: Нават у часе вайны ўваскрослы Хрыстос прыйдзе адваліць камень нашай журбы

Святаслаў

Кіраўнік Украінскай Грэка-Каталіцкай Царквы мітрапаліт Святаслаў распавёў пра асаблівасці перажывання Вялікага тыдня падчас вайны.

«Вялікдзень будзе нават у часе вайны. Уваскрослы Хрыстос прыйдзе да нас, каб адваліць камень нашай журбы. Ён прыйдзе, каб адчыніць зачыненыя нашымі слязамі дзверы, а пасля адчыніць для чалавека надзею, што вынікае з Уваскрасення», —  сказаў кіраўнік УГКЦ.

«Мы ўсе пытаемся сябе: «Чаму?» Мы шукаем сэнс. Мы пакутуем. Мы перажываем вялікае расчараванне, вялікі боль. Усе абставіны, у якіх апынуліся мільёны украінцаў, не могуць не спакушаць хрысціянскае сумленне. І вось, узіраючыся ў раскрыжаванага Збаўцу, у Бога, які захацеў стаць чалавекам, каб пакутаваць, памерці, але і каб з чалавекам, у чалавеку і для чалавека ўваскрэснуць, — мы можам зразумець сэнс нашай пакуты і нашага змагання», — дадаў мітрапаліт Святаслаў.

Кіраўнік УГКЦ патлумачыў асаблівасці святкавання Вялікадня ва ўмовах вайны, нагадаўшы, што Царква імкнецца выканаць прадпісанні вайскова-грамадзянскіх арганізацый і фарміруе расклады богаслужбаў, улічваючы ўмовы каменданцкай гадзіны ў кожнай мясцовасці.

«Мы арганізоўваем богаслужбы, каб яны маглі не проста адбыцца ў дазволены час, але і каб нашыя вернікі маглі своечасова вярнуцца дахаты. Падчас каменданцкай гадзіны мы не плануем праводзіць богаслужбы. Хочам завершыць усё да пачатку каменданцкай гадзіны і пасля працягнуць пасля яе завяршэння, ужо ў Велікодны нядзельны дзень», — сказаў кіраўнік УГКЦ.

У гэтым годзе Вялікдзень будуць асаблівым чынам святкаваць вайсковыя капеланы УГКЦ – разам з войскам, каб данесці велікодную радасць нават на перадавую, «дзе сёння праходзіць мяжа паміж жыццём і смерцю, каб і там зіхацела святло Хрыстовай перамогі і слава Яго Уваскрасення».

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі