Пастар Ганчарэнка: Мы павінныя казаць ісціну нават калі наступіла цемра

Пастор Гончаренко

 Падчас нядзельнага набажэнства на паркоўцы 8 траўня пастар мінскай поўнаевангельскай царквы «Новае Жыццё» Вячаслаў Ганчарэнка нагадаў, як важна казаць ісціну ў любой сітуацыі і адстойваць каштоўнасці Нябеснага Валадарства на гэтай зямлі, распавядае сайт царквы.

 «Мы павінны казаць ісціну нават тады, калі наступіла цемра. Праўда сёння топчацца і караецца, гучыць шмат хлусні. Але праўда павінна гучаць у цемры, каб выкрываць няпраўду. У цёмныя часы казаць праўду цяжэй, чым у светлыя часы. Але толькі так будзе развеяна цемра. Таму што абвешчаная ісціна выводзіць на свет злыя справы, і адбываецца вялікае выкрыццё цемры», — сказаў Вячаслаў Ганчарэнка.

«Процістаяць беззаконню і асудзіць яго — страшна. Мы стаім на паркоўцы і гаворым аб тым, што мы супраць вайны. І калі давядзецца адказваць за гэтыя словы, мы не станем казаць, што мы чагосьці не ведалі. У нас павінна быць пазіцыя асудзіць беззаконне. Не толькі ў чужой краіне, але і ў сваёй краіне, ва ўсім свеце. Няхай гэта будзе не так, як у Еўропе, не так, як у іншых краінах, у якіх ёсць бяспека, дабрабыт і росквіт! Гэта наша вышыня», — падкрэсліў кіраўнік «Новага Жыцця».

«Быў такі чалавек Дзітрых Бонхефер, які ў свой час вельмі смела прапаведаваў і супрацьстаяў беззаконню ў фашысцкай Германіі. Ён сказаў: «Мы павінны не толькі перавязваць раны пацярпелым ад несправядлівасці, але і ўсяляк устаўляць палкі ў колы самай несправядлівасці», — нагадаў Вячаслаў Ганчарэнка.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі