7 прынцыпаў шчаслівай сям’і

32474095_191266061690560_836546903549149184_n15 траўня — Міжнародны дзень сям’і. З гэтай нагоды:

7 ПРЫНЦЫПАЎ ШЧАСЛІВАЙ СЯМ’І

Кожны чалавек створаны Госпадам непаўторным. Таксама сем’і непадобныя адна на другую. Аднак ёсць некаторыя прынцыпы, якія робяць сям’ю шчасліваю.

1. Вера ў Госпада

Сям’я – гэта Божае ўстанаўленне, таму без Бога немагчыма пабудаваць шчаслівую сям’ю.

Калі не Госпад збудуе дом, дарэмны старанні будаўнікоў (Псальм 126:1).

Шукайце перш Валадарства Божага і праведнасці яго, а ўсё астатняе дадасцца вам (Евангелле паводле Мацвея 6:33).

2. Запавет

Кожная сям’я будуецца на запавеце – гэта значыць абяцанні мужчыны і жанчыны разам пражыць жыццё. Гэтае абяцанне даецца перад абліччам Госпада, Які дае сілы выканаць яго.

Таму пакіне чалавек бацьку і маці сваю і прылепіцца да жонкі сваёй (Быццё 2:24).

Бо Госпад сведка паміж табою і жонкаю маладосці тваёй (Малахія 2:14).

3. Любоў

Шчаслівая сям’я – гэта сям’я, дзе муж і жонка любяць адно аднаго. Любоў – гэта не толькі эмоцыі, але рашэнне падтрымліваць любімага чалавека, быць разам з ім.

Мужы, любеце жонак вашых. (Пасланне да Эфэсцаў 5:25).

І вы, жонкі, пакарайцеся мужам вашым. (Першае Пасланне Пятра 3:1).

Любоў доўгацярплівая, любоў ласкавая, не зайздросціць, не бывае ганарыстай, не надзімаецца, не амбітная, не шукае свайго, не злуецца, не думае благога, не цешыцца з несправядлівасці, але радуецца праўдзе, усё пераносіць, усяму верыць, на ўсё спадзяецца, усё церпіць. Любоў ніколі не знікае. (Першае Пасланне да Карынцянаў 13:4-8).

4. Прабачэнне

Ніякія адносіны ў сям’і не будуць трывалымі без узаемнага прабачэння. Прабачаць – гэта значыць таксама прызнаваць свае памылкі і першаму імкнуцца да прымірэння.

Калі вы даруеце людзям правіны іхнія, то і вам даруе Айцец ваш, Які ў небе. (Евангелле паводле Мацвея 6:14)

Гневаючыся, не грашыце, сонца няхай не заходзіць у гневе вашым (Пасланне да Эфесцаў 4:26)

5. Адказнасць

Калі ў сям’і муж і жонка не ігнаруюць адно аднаго, а дапамагаюць і падтрымліваюць сужонка, такая сям’я сапраўды будзе шчаслівай.

Насеце цяжары адзін аднаго (Пасланне да Галатаў 6:2).

6. Вернасць

Жонка павінна мець пэўнасць, што муж заўсёды будзе з ёю, не здрадзіць ёй. Таксама муж патрабуе мець моцную падтрымку з боку жонкі, упэўненасць у сваёй “другой палове”.

Не блудзі (Выхад 20:14).

Што Бог злучыў, чалавек няхай не разлучае (Евангелле паводле Марка 10:9).

Верны ў малым, і ў многім верны, і няправедны ў малым, і ў многім няправедны (Евангелле паводле Лукі 16:10).

7. Дзеці 

Найважнейшая задача сям’і – быць месцам, дзе нараджаюцца дзеці і дзе яны выхоўваюцца да паўнацэннага жыцця. Дзеці давераныя Госпадам бацькам, каб яны выхавалі іх у веры ў Бога і дапамаглі адкрыць і рэалізаваць увесь патэнцыял, закладзены Творцам.

Вось ад Госпада дар – гэта дзеці (Псальм 126:3).

I вы, бацькі, не раздражняйце дзяцей вашых, але выхоўвайце іх у вучэнні і напамінанні Госпадавым (Пасланне да Эфесцаў 6:4).

Меркаванні аўтараў блогаў могуць не супадаць з меркаваннем рэдакцыі Krynica.info

bokun

Пастар Царквы Ян Прадвесьнік

15 траўня 2018 | Блогі | Тэгі: , ,



Блогі