Аб’яднаныя трагедыяй

maxresdefault

Беларусь – адна з нешматлікіх краін, дзе на афіцыйным узроўні святкуюць Раство двойчы – 25 снежня і 7 студзеня. Так склалася з-за шэрагу гістарычных прычын. Магчыма, калі-небудзь такі падзел будзе пераадолены, і беларускія хрысціяне змогуць разам святкаваць найважнейшыя святы, дзякуючы чаму іх голас і малітвы будуць мацнейшымі. Але пакуль маем, што маем.

Тым не менш, у гэты раз беларускія хрысціяне, перш за ўсё каталікі і праваслаўныя, былі аб’яднаныя, але аб’яднаныя … трагедыяй.

Спачатку 23 снежня каля 17:00 у Гродне ў выніку аўтамабільнай аварыі загінуў прафесар гродзенскай каталіцкай Вышэйшай духоўнай семінарыі, ксёндз Тадэвуш Вышынскі. А затым у Барысаўскім раёне ў ноч на 6 студзеня была забітая ігумення Cвята-Ксеніеўскага манастыра ў вёсцы Барань матушка Васіліса (Мядзведзь).

Абедзве трагедыі адбыліся напярэдадні радаснага свята Божага Нараджэння, якое каталікі святкавалі 25 снежня, а праваслаўныя – 7 студзеня.

І як тут не прыслухацца да слоў Барысаўскага праваслаўнага епіскапа Веніяміна: вораг роду чалавечага ўзмацняе сваё дзеянне, спрабуючы пасеяць збянтэжанасць, смутак і трывогу ў душах вернікаў людзей напярэдадні светлага свята Раства Хрыстова – дня агульнай радасці пра прыход у свет Збавіцеля.

Уваскрасенне Хрыстова хрысціяне Беларусі сёлета будуць сустракаць разам – 16 красавіка. Будзем спадзявацца, што на гэты раз падстаў для радасці будзе больш, чым для смутку.

Меркаванні аўтараў блогаў могуць не супадаць з меркаваннем рэдакцыі Krynica.info

maksim

Журналіст, галоўны рэдактар КРЫНІЦА.INFO




Блогі