Афіцыёзная “духоўнасць” замест Хрыстова вучэння

50448724_2267285356669288_8913621108591165440_o

Афіцыёзная “духоўнасць” нічога агульнага з Хрыстовым вучэннем не мае. Я тут маю на ўвазе розныя “духоўна-асветніцкія” мерапрыемствы з удзелам райвыканкамаўскіх чыноўнікаў, супрацоўнікаў аддзелаў ідэалагічнай работы і культуры, асветленыя ў раённых газетах, ды з удзелам запрошаных прадстаўнікоў, як правіла, адной “афіцыйнай” Царквы.

Даўно кінулася ў вочы, што ўдзельнікі такіх мерапрыемстваў карыстаюцца вельмі размытай тэрміналогіяй і пазбягаюць канкрэтыкі. Замест “ісці да Хрыста/ісці за Хрыстом” – “дарога да святыняў”. Замест “Евангелля” – абстрактная “духоўнасць”, “духоўныя традыцыі”.

Насамрэч, гэтыя паняцці вельмі зручныя. У “духоўнасць” можна закласці які хочаш сэнс – хоць сапраўднае хрысціянскае жыццё, хоць заход у царкву паставіць свечку, хоць акунанне голым у палонцы. І не запярэчыш прамоўцу/пісаку, які кажа пра “духоўнасць”. Як бы і правільныя словы кажа – але ж пустыя-пустыя.

А з іншага боку, не скажа чыноўнік, які крадзе, хлусіць, прыніжае падначаленых, фальшуе выбары, парушае законы, пра вернасць Богу, пра жыццё па Божых запаведзях, па хрысціянскай маралі. Бо сумленне ж ягонае запратэстуе: ён жа ведае, што ён па запаведзях не жыве, і ягоныя калегі па іх не жывуць, і жыць не збіраюцца. А “духоўнасць” – слова такое няяснае, яно як бы і не замінае.

На ўскрайку Докшыц у межах “міжнароднай духоўна-асветніцкай экспедыцыі “Дарога да святыняў” заклалі “Сад малітвы”. Назва ідыёцкая – ну хто будзе маліцца ў гэтым маленькім скверыку, заціснутым паміж дзвюх шумных дарог? Але ж сабраліся, “правільныя” словы сказалі, пад “правільнай” назвай скверык заклалі, у раённай газеце “правільны” артыкул напісалі.

Адно добра – што дрэвы пасадзілі. Вырастуць – будуць людзям, добрым і злым, позірк цешыць.

Меркаванні аўтараў блогаў могуць не супадаць з меркаваннем рэдакцыі Krynica.info

шыталь

журналіст, грамадскі актывіст

21 студзеня 2019 | Блогі | Тэгі: ,

Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты