Беларусы, Стоўбцы і Бог

Estación 4

Цяжка пісаць пра Стоўбцы.

Бо калі рэжуць адзінаццацікласніка, які размаўляе па-беларуску і носіць майку з “Пагоняй” – гэта быццам нажом па горле табе самому.

Калі забіваюць настаўніцу, якая распавядала вучням пра родную краіну і яе гісторыю – быццам ускрываюць з крывёю тваю матулю, сястру, жоначку – усіх трох настаўніцаў.

Маўчыць той, хто гэта зрабіў – за што.

Тыя, хто ляжаць у Курапатах, таксама ня ведалі – за што іх так.

Пяшчотнасць і безабароннасць чалавечага жыцця перад грубым і сляпым гвалтам заўжды агаломшвае.

Але насамрэч Стоўбцы – гэта зусім не выняткавы выпадак. Проста бліснула ярка, вось нас дрыжыкі і пранялі.

…А тысячы самагубстваў ды забойстваў штогод у Беларусі? А сотні тысячаў алкаголікаў, і месца ў першай тройцы ў свеце паводле спажывання, з раптоўнымі разрывамі сэрца ды цырозамі печані ад гэтага? А дзясяткі тысячаў абортаў у год – такімі ж ножычкамі? гэтак жа халаднакроўна?…
Гэта мы, беларусы.

Зло не дзе-небудзь там, у нейкім асобна ўзятым гандлёвым цэнтры з бензапілой, у забытым райцэнтры, у турме. Зло ўнутры нас. Сярод народа, які так і не пакаяўся ў страшных грахах бязбожжа і камунізму, які забывае сябе, сваю мову, сваіх продкаў.

І ёсць толькі адно Выйсце з гэтай багны.

Ісус Хрыстос, Якога забілі гэтак жа – ні за што. Які гэтак жа сцякаў крывёй на вачох у астатніх.
Ён, Які памёр за наш грэх і ўваскрос, ведае адказ. Толькі Ён можа прытуліць ахвяру, суцешыць сваякоў і нават прывесці да пакаяння забойцу.

Не следчыя, суседзі, аднакласнікі, журналісты, правіцелі – толькі Ісус Хрыстос, Сын Чалавечы, адкажа на ўсе пытанні. Сабой.

Меркаванні аўтараў блогаў могуць не супадаць з меркаваннем рэдакцыі Krynica.info

sevjarynec

Павел Севярынец, нарадзіўся 30.12.1976. Беларускі пісьменнік, публіцыст, у 1997-2004 гг заснавальнік і лідэр “Маладога Фронту”, з 2004 г і дагэтуль – сустаршыня партыі Беларуская Хрысьціянская Дэмакратыя. Больш як 5 гадоў адбыў у зняволенні паводле палітычных прысудаў. Аўтар кнігаў: “Ды-джэй Адраджэння”, ” Пакаленне Маладога Фронту”, ” Люблю Беларусь”, “Брату”, “Лісты з лесу”, “Беларуская глыбіня”. Лаўрэат літаратурнай прэміі імя Алеся Адамовіча (2006), прэміі імя Васіля Быкава “За свабоду думкі”(2008). Жанаты. Праваслаўны хрысціянін.
Фраза, якую не можа чуць: ” Ай, няхай, і так сыдзе”.
Любімая цытата: ” Няхай не сумняваецца сэрца вашае; веруйце ў Бога і ў Мяне веруйце” – кажа Ісус. ( Евангелле паводле Яна, 14:1) – верш з Бібліі, пасля якога пакаяўся і прыняў Хрыста.

12 лютага 2019 | Блогі | Тэгі:



Блогі