Хрысціянскія фільмы. Сельма

сельмаВыбарчае права з’яўляецца адной з неад’емных грамадзянскіх свабод, якая дазваляе людзям самім прымаць на сябе адказнасць за тое, як будзе развівацца іх краіна, як будуць жыць яны і іх дзеці. Менавіта таму барацьба за права абіраць і быць абраным з’яўляецца неад’емнай часткай барацьбы за грамадзянскія свабоды.

Гэтай тэме прысвечаны фільм «Сельма», які мы прапануем вашай увазе ў рубрыцы «Хрысціянскія фільмы». Стужка распавядае пра падзеі 1965 году, калі чарнаскурыя жыхары ЗША фактычна былі пазбаўленыя выбарчага права. Калі яны не маглі абраць тых, хто б мог сапраўды прадстаўляць іх інтарэсы і абараняць іх правы. Так, яны ўжо 100 гадоў як не былі рабамі, у іх былі «чарка і скварка», але ў палітычным плане яны былі бяспраўныя. Узначаліў гэтую барацьбу баптысцкі пастар, лаўрэат Нобелеўскай прэміі міру Марцін Лютар Кінг, які з’яўляецца адным з ідэолагаў і яскравых прыкладаў негвалтоўнага супраціву.

Падзеі фільма, які заснаваны на рэальных падзеях, разгортваюцца ў маленькім мястэчку Сельма на амерыканскім поўдні, які вельмі яскрава адлюстроўваў становішча чарнаскурага насельніцтва ў ЗША. Менавіта сюды для барацьбы супраць бяспраўя і расізму і прыехаў са сваімі прыхільнікамі пастар Марцін Лютар Кінг. У якіх умовах праходзіла барацьба, чым даводзілася ахвяраваць яе ўдзельнікам і да чаго яна прывяла, вы зможаце даведацца, паглядзеўшы фільм «Сельма».

Стужка, якая выйшла ў 2014 годзе, была адзначана чатырма намінацыямі на 72-й цырымоніі ўручэння ўзнагарод прэміі «Залаты глобус»: лепшы драматычны фільм, лепшая рэжысура, лепшая мужчынская роля ў драматычным фільме і лепшая песня, а таксама атрымала «Оскар» у намінацыі «лепшая песня да фільма».

«Сельма» (Selma)

Год/краіна – 2014/ЗША

Рэжысёр – Ава Дзювернэй

У ролях – Дэвід Аелаўа, Кармэн Эджога, Том Уілкінсан, Тым Рот

Меркаванні аўтараў блогаў могуць не супадаць з меркаваннем рэдакцыі Krynica.info

24 жніўня 2015 | Блогі | Тэгі: , , ,



Блогі