Свабода

Васіль_БыкаўЧалавек, як i кожная жывая iстота ад Бога, нараджаецца свабодным.

Ад нараджэньня закладваецца ў чалавека інстынкт свабоды.

Васіль Быкаў

 

Свабода, воля, незалежнасьць… Як шмат у гэтых словах для кожнага чалавека, наколькі па-рознаму могуць успрымацца яны натуральнымі памкненьнямі для адных, а ў той жа час – чымсьці незапатрабаваным і нават шкодным для іншых.

Для кагосьці свабода – гэта проста магчымасьць жыць, а хутчэй – існаваць, каб ніхто не замінаў хадзіць на 8-мігадзінную працу 5 дзён на тыдзень, дзе збольшага няма рэальнае дзейнасьці, а ёсьць прасіджваньне штаноў ды марнаваньне часу. Пасьля ж гэтае няхітрае імітацыі працы такія “вольналюбіўцы” ужываюць знакамітыя “чарку ды шкварку”, глядзяць зомбіскрынку, чытаюць прапагандысцкую прэсу, праўда ня цалкам, а толькі тыя кавалкі, якія высоўваюцца з-пад няхітрае закусі, а пасьля з такімі ж ня надта прыхільнымі да працы, аднак зь вялікімі знаўцамі ўсяго ды ўся сябрукамі абмяркоўваць, што ўсе беды ў краіне ад злашчаснае Амэрыкі, нават загажанасьць пад’езду, чэргі ў паліклініках, а таксама кошт на гарэлку ды іншыя пладова-ягадныя напоі.

Хтосьці бачыць свабоду як магчымасьць праявы разнастайнае творчасьці, якую часта блытаюць з уседапушчальнасьцю, калі размалёўваюцца помнікі гісторыі, альбо праводзяцца пэрформансы са зьнішчэньнем кнігаў, карцінаў ці іншых артэфактаў. Такія людзі таксама лічаць сябе вольнымі, аднак забываюцца, што ёсьць цудоўны прынцып, шмат дзе апісаны ды сфармуляваны, аднак як мала тых, хто яго прытрымліваецца, а ня толькі дэклямуе. Гутарка пра тое, што свабода ёсьць да таго моманту, пакуль яна ня шкодзіць свабодзе іншых людзей. Як шкада, што ўсе хочуць быць тымі, для каго мусіць быць выключэньне, а ня тымі, хто пачынае ствараць ўзаемапаважаванае грамадзства зь сябе, з уласнага прыкладу.

Аднак, вядома, ёсьць і тыя, хто імкнецца да той свабоды, калі штодня можна пачувацца вольным, жыць належным ды незалежным чынам, памятаць ды шанаваць сваіх продкаў, быць вартым грамадзянінам той краіны, дзе нарадзіўся.

То бок, для гэтых людзей свабода ёсьць натуральнаю чалавечаю праяваю, простай жыцьцёвай неабходнасьцю, калі, паводле Васіля Быкава, “Чалавек, які аднойчы адмовіўся ад волі, назаўжды робіцца вязьнем”.

Меркаванні аўтараў блогаў могуць не супадаць з меркаваннем рэдакцыі Krynica.info

Фота_Алесь_Мазанік

Мэнэджар культурніцкіх праектаў, мае дыплом Мінскага інстытуту кіравання, заснавальнік і кіраўнік інтэрнэт-крамы imbryk.by, ды-джэй Адраджэння. Актыўна спрычыніўся да дзясяткаў музычных, выдавецкіх, грамадскіх акцыяў, паспяховы беларускамоўны прадпрымальнік.

24 лютага 2015 | Блогі | Тэгі: ,

Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты