Пясочная тэрапія альбо заняткі з пяском

Дзіцячыя псіхолагі і педагогі ўсё часцей выкарыстоўваюць у сваёй працы метад пясочнай тэрапіі. Гэта незвычайная і вельмі эфектыўная тэхніка для псіхакарэкцыі, навучання, развіцця творчых здольнасцяў. Займацца пясочнай тэрапіяй можна як у групе, так і індывідуальна.

У працы псіхолага пясочную тэрапію часцей за ўсё выкарыстоўваюць для вырашэння наступных праблемаў:

— эмацыйныя праблемы, хібы паводзінаў дзіцяці (страхі, агрэсія, капрызы і г.д);

— перажыванне складаных жыццёвых сітуацыяў (развод бацькоў, смерць блізкіх, змена месца жыхарства ці вучобы);

— праблемы ўзаемаадносінаў у сямі ці дзіцячым калектыве.

Мэта пясочнай тэрапіі: стварыць для дзіцяці ўмовы бяспекі і камфорта,у якіх ён навучыцца разумець і спраўляцца з унутранымі перажываннямі.

Задача пясочнай тэрапіі: паступовае ўсведамленне праблем і іх вырашэнне.

На занятках у адукацыйным цэнтры «Крочым разам» праца з пяском з’яўляецца адным з любімых метадаў навучання. Шматлікія гульні на развіццё дробнай маторыкі, інтэлекту,сэнсорнай інтэграцыі, творчыя заданні з пяском дазваляюць зрабіць заняткі больш насычанымі, цікавымі і карыснымі.

Прывядзем некалькі прыкладаў простых заданняў і гульняў, якія вельмі палюбіліся нашым дзеткам. Замест пяску і вялікай пясочніцы можна выкарыстоўваць манку і паднос.

lPR1Q1r6UqA

Гульня «Уводзіны ў пясочніцу»

Кожны раз перад тым як пачаць працу з пяском, дзеткам прапануецца своеасаблівы рытуал.У нашым цэнтры гэта вітанне з Пясочным чалавекам:

— адкрытыя далоні кладзем на пясок і паўтараем такія словы: «У далонькі нашы паглядзі!Там дабрыню, любоў знайдзі! Пясочны чалавек,прыйдзі!»;

— прапануем дзеткам паказытаць і пагладзіць Пясочнага чалавека пальчыкамі і далонямі.

pR6xwj6U_0M

Гульня «Дожджык»

Прапануем дзецям зрабіць спачатку слабы дожджык (набіраем у жменю крыху пяску, паднімае рукі на 10-15 см ад пясочніцы і раскрываем далоні), затым мацнейшы (больш пяску, вышэй рукі) і вельмі моцную залеву (поўныя жмені пяску, рукі як мага вышэй).

mpST8iB6OA8

Гульня «Самая высокая гара»

Прапануйце дзеткам паспаборнічаць паміж сабой або з вамі і зрабіць з пяску самую высокую гару. Пасля вызначэння пераможцы можна адправіць на гэту гару экспедыцыю і ўсталяваць на вяршыню сцяг! Для гэтай гульні добра падыдуць дробныя цацкі з Лега, Кіндэрсюрпрызаў ці Бонсцікі, з якіх ужо можна не тое што экспедыцыю сабраць, а цэлае войска.

Гульня «Намалюй узор»

Гэта гульня добра развівае дробную маторыку,увагу,памяць і фантазію.Дзецям можна прапанаваць паўтарыць нейкі ўзор, фігуру, літару. Або даць заданне намаляваць прадмет, сітуацыю, свой настрой і пачуцці ў дадзены момант.

1o41_blyGN0

Гульня «Ствараем свой свет»

У нашых занятках дзеткам больш за ўсё падабаецца ствараць у пясочніцы свой фантазійны свет і насяляць яго рознымі жыхарамі. Для гэтага падыходзяць дробныя фігуркі жывёлаў і людзей, каменьчыкі і іншыя прыродныя матэрыялы, дробныя прадметы інтэрʼеру. Галоўнае даць дзецям магчымасць выбару і свабоды ў дзеяннях. Пасля таго, як кожны стварыў свой свет, дзеткі па чарзе прэзентуюць сваю працу: распавядаюць гісторыі, дзеляцца ўражаннямі і пачуццямі ад узаемадзеяння з пяском і матэрыяламі.

Гульня з пяском – гэта падарожжа не заўсёды простае, але заўсёды яркае і незабыўнае!

Добрых і карысных гульняў жадае вам каманда адукацыйнага цэнтру «Крочым разам»!

 Падрыхтавала Кацярына Гарэцкая

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар МТС: +37529 566 45 53. Па магчымых пытаннях звяртайцеся на krynica.editor@gmail.com
19.02.2018 | Тэгі:


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты